Ուկրաինական HotSport.ua-ն նշում է, որ Հայաստանի հավաքականի խաղացող Հենրիխ Մխիթարյանը Դոնեցկի «Շախտյոր» վերադառնալու դեպքում կարող է խոշոր տուգանք վճարել:

Բրազիլական UOL Esporte-ին այս տարի հաջողվել էր գտնել մի փաստաթուղթ, որում ներկայացված են «Շախտյորում» հաստատված տուգանքների չափերը: Պատահական չէ, որ հենց բրազիլացիներն են «գաղտնազերծել» փաստաթուղթը, քանի որ «Շախտյորում» իրենց կարիերան չեն ցանկացել շարունակել մի շարք բրազիլացի ֆուտբոլիստներ:

Ըստ այդ փաստաթղթի, ուսումնամարզական հավաքներին ուշացումով ներկայանալու դեպքում, «Շախտյորը» իր խաղացողներին տուգանում է ամսական աշխատավարձի 50%-ի չափով: Եթե դեպքը կրկնվում է, ապա տուգանքը հասնում է 90%-ի:

Հիշեցնենք, որ Մխիթարյանը «Շախտյոր» պետք է վերադառնար հունիսի 23-ին, սակայն առայժմ չի միացել իր թիմին և չի բացառվում, որ առաջիկա օրերին տեղափոխվի այլ ակումբ:

armsport.am