Արդեն տեղեկացրել ենք, որ երեկ՝ մայիսի 21-ին դորտմունդյան թիմի ընդհանուր խմբում մարզումները վերսկսել էր «Բորուսիայի» առաջատարներից մեկը՝ Մարիո Գյոտցեն, ով գալիք մրցաշրջանից հանդես է գալու Մյունխենի «Բավարիայում»։

Ինքնազգացողության բարելավումից հետո գերմանացին, երեքշաբաթյա ընդմիջումից հետո, որոշել էր նորից մարզման դուրս գալ և միացել էր թիմին: Սակայն, ինչպես հայտնում է «Sport Bild»-ը, ֆուտբոլիստը ժամանակից շուտ է ավարտվել պարապմունքը, քանի որ կրկին զգացնել է տվել նրա՝ օրերս ապաքինված վնասվածքը: Մարիոն ստիպված է եղել իր թիմակիցներից շուտ ավարտել պարապմունքը:

Հիշեցնենք, որ Գյոտցեն վնասվածք էր ստացել Չեմպիոնների լիգայի կիսաեզրափակիչ՝ «Ռեալի» հետ պատասխան խաղի ժամանակ: Այսօր՝ մայիսի 22-ին Գյոտցեն կրկին հետազոտության կենթարկվի:

«Բորուսիայի» երեկվա մարզման ընթացքում ոտնաթաթի մի փոքր վնասվածք է ստացել «Բորուսիայի» լավագույն ռմբարկուն՝ Ռոբերտ Լևանդովսկին: Բժշկական փոքրիկ միջամտությունից հետո լեհ ֆուտբոլիստը շարունակել է մարզումը։
 
Շաբաթ օրը՝ մայիսի 25-ին Դորտմունդի «Բորուսիան» Չեմպիոնների լիգայի եզրափակչում կմրցի Մյունխենի «Բավարիայի» հետ: