Դորտմունդի «Բորուսիան» հետաքրքրված է «Աստոն Վիլայի» հարձակվող Կրիստիան Բենտեկեի ծառայություններով, տեղեկացնում է բրիտանական Sky Sports-ը` հղում անելով Bild-ին:

Գերմանական ակումբը շահագրգռված է նոր հարձակվող գնելով, քանի որ թիմի լեհ հարձակվող Ռոբերտ Լևանդովսկու` թիմում մնալ չմնալու հարցը, մշուշոտ է:

Այդ իսկ նպատակով, «դեղնասևերի» ղեկավարությունը սկաուտներ է ուղարկել Անգլիա, որպեսզի վերջիններս Անգլիայի Պրեմիեր լիգայի 37-րդ տուրի` «Չելսիի» դեմ հանդիպման ընթացքում (1-2), հետևեն Բենտեկեի գործողություններին:

Նշենք, որ Բենտեկեն այս մրցաշրջանում աչքի է ընկնում գոլային մեծ հոտառությամբ. բելգիացին 34 խաղում դարձել է 19 գոլ հեղինակ և Պրեմիեր լիգայի լավագույն ռմբարկուների ցուցակում գտնվում է 4-րդ հորիզոնականում` մեկ գոլ քիչ ցուցանիշով, քան «Տոտենհեմի» առաջատար Գարեթ Բեյլը: